Sito in ItalianLa storia
La storia del Comitato Festeggiamenti de Campagnari
El nostro comitato lè nato a metà dei ani 70 so inisiativa de un grupo de amissi de a contrà, co a voia de godarsea e de far godare la zente.
La regoea principae che se gà dato sto comitato a iera e a xe uncora desso che tuti i schei che se ciapa organisando feste durante l'ano i vae senpre in beneficensa .
L'inisio l'è stà na roba ecessionae, i ga scumissia col fare i cari mascherati e mi me ricordo che iero picinin, e sti cari che ogni volta che i partia pa ndar sfiare i ndava vanti e indrio pae strade del paese co tuta a zente fora a sighare e a batare e man .
Unpuchi de ani dopo se gà pensà de organisare el 1 de maio de ogni ano na sagra del paese, co tiro dea corda, el spacapignate,a cucagna e tanti altri zughi ,fasendo rivare parfin le giostre e credime che in quei ani co rivava i cami dele giostre la iera proprio na sagra,ghe iera putei dapartuto. Unpoco a volta la sagra a xe cressua senpre de pì , zontandoghe robe senpre nove, come la bicicretada che romai da 15 ani la ce porta longo un tragito de 20 chiometri a spasso pai cavini e i trudi pi bei de e nostre campagne fin a rivare in brenta doe che se magna na feta de fugassa , se beve un'onbra de vin e dopo se riparte pa tornare ai Campagnari. Coi ani se gà dovuo canbiare anca i zughi popoeari,e eco che el paeo dea cucagna xe diventà l'albaro dea cucagna ,parchè i tusi al dì de uncò xà i fà fadiga dar sù pa un'albaro figuremosse se i và sù pa un paeo tutto sporco de oio. Nei ultimi tre ani ghemo scumissia a fare anca un spetacoeo fato de baiti ,comedie, barsaete fate tute con aturi dai Campagnari, dopo ghe xe na gran cusina con costi-ioe, luganeghe, bisteche e tanto vin bon.
Col passare de i ani ghemo zontà uncora feste ,ricordemo in giugno el "TORNEO DE CALCETO" a sinque omani, la "FIERA CAMPAGNAROTA", Eel "NATAE" e pa ultima ma non de inportansa "LA BEFANA".
El"TORNEO DE CALCETO" se fà sui campiti ai Campagnari e dal 1999 che ghemo scumissià a farlo ogni ano ghe xe squadre senpre pi forti e senpre de pì zente.
La "FIERA CAMPAGNAROTA" invese xe in otobre, se fà el pranso sociae, e dopo magnà se canta e se baea co "ROBERTO"che lè el cantante uficiae del paese, tutto conpagnà da maruni, suca, patate mericane e torbuin .
A"NATAE"se pica e luci soa nostra ceseta, e dopo la sera de a vidilia ghe xe babo natae che porta i regai ai putei fora pa e case.
Par "LA BEFANA"che se fà senpre la sera del 6 ienaro, i primi ani sè brusava la PIROEA PAROEA dopo un poco ala volta se gà scumissia a fare robe senpre pì grande come la casa dea befana,el leto dea befana ,el casteo ,tute robe che rispeciava le tradission e la vita contadina del nostro paese. Nel 2002 ghemo fato na roba che restarà nea storia,ghemo fato la scoa pi granda del mondo (22 metri) co na befana de 10 metri che a iera monta insima a scoa el tutto senpre conpagnà da un mucio de fughi artificiai.
Ve vedarve chealtre pagine e no vè ciamarì pentii.
Cesco & Fiore